Manajemen Usaha ala Sunda
BERITA JABAR NEWS (BJN) – Rubrik Bahasa Sunda, Jumat, 30 Agustus 2024 – Artikel berjudul “Manajemen Usaha ala Sunda” ini merupakan karya Sony Vespa yang ditulis dengan bahasa Sunda. Selain menjalankan bisnis dalam bidang handycraft, pria bernama lengkap Sony Sanjaya ini juga merupakan pegiat seni dan budaya di Kota Cimahi.
Salah sahiji hikmah silaturahmi, salian ngaraketkeun duduluran bari manjangkeun babarayaan bisa oge keur nambahan pangaweruh. Komo deui mun anu dianjangan teh salah sahiji budayawan “kahot” Kota Cimahi siga Mang Ujang Laip (Yudhistira Purana Shakyakirty) nu luhur elmu jembar pangarti. Estunik balaka tiktrik balaka combrang, beuteung mutiktrik elmu na meunang. Nya ngelek nya ngegel teh enyaan.
Obrolan nu paling di pikaresep ku kuring mah tara jauh tina masalah kahirupan. Keur para nonoman Sunda sawadina kudu wanoh bari ngamumule kalawan daek leukeun ngaguar tutungkusan anu nyamuni dina kaahengan budaya Sunda.
Urang guar geura, eusi paguneman kuring jeung Mang Ujang sababaraha poe nu kaliwat. Ieu pedaran minangka na mah leuwih ka sikep hirup dina raraga ngaronjatkeun usaha ameh kaala hasilna bari teu ngarempag kana aturan.
Sikep hirup nu ngahambat kana kamajuan usaha
Kahiji, memeh ngala, miceun heula. Dilarapkeun ka sikep urang nu kaleuleuwihi dina waktu rek miang atawa ngamimitian digawe. Asa kasindiran ku kalimah ieu, sok inget kuring mun rek miang, ti mimiti mumuluk terus ngopi bari diselang udud, kitu deui pas keur ngaso. Tungtungna beubeunangan poe ieu teh loba kacoceng ku pengeluaran nu sabenerna bisa dikurangan.
Kadua, mokahaan/mangpang meungpeung. Nyaeta kaleuleuwihi mangsa aya rezeki. Siga nu kokoro manggih mulud atawa puasa manggih lebaran. Istuning ngumbar nafsu bari teu ingeut kana ngeureut jeung neundeun.
Katilu, pupujieun. Unggah adat pas usaha maju nu balukarna nambahan pengeluaran keur nyumponan nafsu.
Kaopat, kabita ku barang saeutik. Resep ngajualan aset atau barang berharga atawa warisan ti kolot bari teu make itungan nu asak jeung teu dina kaayaan butuh nu tungtungna duit ludes, banda ngiles atawa kaganti ku barang lain nu pangajina sahandapeun barang nu tadi di jual.
Opat sifat di luhur sakuduna dijauhan mun urang hayang aya dina kamajuan usaha.
Terus naon atuh nu kudu dipilampah ameh usaha urang bisa maju bari mucekil hasilna? Yap kadieu urang guar.
Kahiji, amit atawa bebeja. Nyaeta masrahkeun sagala urusan ka Gusti Allah dina sagala kaayaan. Susah, senang bari di barengan ku jujur, euweuh nu di sumput salindungkeun boh ka rekan usaha komo ka pamajikan.
Kadua, imeut atawa taliti. Teu gurung gusuh atawa buru – buru bari teu pundungan mun pagawean urang kacawad ku batur.
Katilu, emet atawa irit. Apik ka nu leutik, lebar ka nu gede, teu di monyah monyah komo mangpang meungpeung mah.
Kaopat, emut atawa sadar. Teu poho ka purwadaksi. teu tunggul di rarud catang di rumpag. Ngaleukeunan gawe bari teu ngarempag kakuduan jeung kacaduan hirup.
Pedaran di luhur, ampun paralun lain maksud nyanyahoanan. Komo bari mapatahan ngojay ka meri mah. Estuning ukur sharing hasil paguneman dina raraga silih elingan, bari ngamumule budaya Sunda.
Punten pisan bilih aya kalepatan dina undak usuk basa atawa pedaran.Cag aah. (Sony Vespa).
***
Judul: Manajemen Usaha ala Sunda
Penulis: Sony Vespa
Editor: JHK