Transportasi Publik

BERITA JABAR NEWS (BJN) – Artikel berjudul “Transportasi Publik” ini merupakan karya “Sony Vespa” yang ditulis dengan bahasa Sunda.

Aya perlu ngadadak tadi beurang mah.  Aya cokoteun ti sisi lembur nu teu bisa diliwatan ku motor,  nya antuk na mah ngahaja naek angkot.

Ngajanteng sisi jalan aya kana lima menitan,  teu lila angkot datang. Geuwat naek. Di jero angkot rada lowong,  ngan aya kuring jeung dua penumpang awewe.

Jadi, ras ka zaman bujangan baheula,  basa masih gawe di hiji pabrik daerah Cimindi,  Cimahi. Ampir unggal poe naek angkot teh, salian kaitung murah ongkosna,  katambah lumayan gancang teu siga beus jemputan karyawan nu sok kukurilingan heula ngajemput karyawan nu lain,  jadi weh rada lila.

Baheula mah ilahar pisan jalma mun indit inditan teh naek angkot,  teu naek motor siga ayeuna. Nu matak sok loba wae penumpang angkot teh, malah di jam sibuk mah loba penumpang nu teu kaangkut atawa ngahaja cicing ngagulayun di panto angkot.

Transportasi publik baheula mah pernah jadi primadona, salian angkot aya beus Damri, atawa mikrobus antar kota siga Kotrima atawa Giwangkara nu trayek umumna nyaeta Cililin – Cileunyi PP.

Moda transportasi rakyat eta diandelkeun pisan ku masyarakat keur indit inditan, penumpang nepi ka pajero atuh,  enya “pajero”, padedet di jero.

Sawareh diuk dina jok beus,  lolobana mah nangtung,  pating gulayun nyekelan beusi paranti pamuntangan. Sagala aroma pacampur jadi hiji,  perpaduan ti minyak kayu putih,  campur parfum jeung kesang,  ngahiliwir sajajalan.

Ku perkembangan zaman,  kebijakan nyicil motor digampang keun, pamor angkot jeung beus mimiti rada ngendoran,  masyarakat paheula heula ngiridit motor. Salian ti DP murah,  cicilan oge bisa mangtaun taun.

Nepi ayeuna kuring bingung keneh naon singketan DP teh. Aya nu ngomong singkatan ti “dana pertama”,  aya oge “duit pangjadi”,  atawa “duit pamanjer”. Teuing nu mana nu bener na.

Ku perang DP murah bari cicilan mangtaun taun antuk na di jalan pinuh ku motor,  teu sirikna ngajengjreng noyeg di lampu merah lir ibarat rametuk nyampeurkeun patromak.

Ku loba na masyarakat nu mampuh ngiridit atawa meuli motor (loloba na mah maksakeun) atuh ngurangan kana jumlah penumpang angkot atawa beus kota teh,  komo deui ditambah ayana Ojeg Online jeunf Taxy Online.

Tanggal 27 oktober 2021 mangrupakeun poe panungtung keur bus Kota Damri beroperasi,   puluhan tahun ngurilingan Kota Bandung,  ngitung lembur ngajajah milangan kori,  antukna bus Damri amit mungkur ninggalkeun panineungan ka warga Bandung.

Kaitung gede jasa bus Damri teh ngawulaan jeung nganteurkeun masyarakat Bandung jeung sabudeureun na.

Pileuleuyan Damri.

Ari angkot mah bertahan keneh, sanajan jumlah jeung jam operasional ngurangan oge. Mun baheula nepi tengah peuting atawa ngalong , kiwari mah ngan nepi bada Isya,  malah sakapeung mah Magrib  oge geus jarang nu nambangan angkot teh.

Tempat nu dituju ampir kaliwatan, kuring mencet bel terus turun saenggeusna mayar ongkos. Angkot maju kakidulkeun ninggalkeun haseup knalpot jeung kebul.

Di tengah gempuran transportasi publik nu mingkin ngutamakeun kenyamanan jeung praktis,  teuing nepi iraha angkot bakal bertahan. (Sony Vespa).

***

Judul: Transportasi Publik

Editor: Kang Arie