Jalma Leutik

BERITA JABAR NEWS (BJN) – Artikel berjudul “Jalma Leutik” ini merupakan karya “Sony Vespa” yang ditulis dengan bahasa Sunda. Selain menjalankan bisnis dalam bidang handycraft, pria bernama lengkap Sony Sanjaya ini juga merupakan pegiat seni dan budaya di Kota Cimahi.

Urang batak dagang batik
Nincak batok ngabeletek
Nu matak mun hirup leutik
Ulah kagok dagang lotek

Sisindiran di luhur mangrupakeun sisindiran karesep kuring nu nepi ayeuna napel dina ingetan,  salian ti kalimahna nu ngalagena,  ditambah oge eusi sisindiran na nu siga heureuy,  tapi teu matak ngurangan kana eusi.

Di zaman ayeuna, dina perkembangan tehnologi nu sakitu pesatna,  kahirupan jalma leutik nu tisusut tidungdung dina raraga minuhan pangabutuh sapopoe jadi inspirasi boh dina tayangan program TV atawa konten konten di medsos.

Aya tayangan nu mere rezeki nomplok ka jalma leutik bari diembohan ku atraksi jalma eta kudu balanja meakkeun duit nu sakitu loba na dina waktu nu samporet. Di belaan tibabaranting eta jalma balanja bari di udag-udag reporter jeung kru TV,  atawa aya oge program TV nu mantuan ngarenovasi imah nepi layak huni.

Salian ti program TV,  di media Sosial oge konten nu ngalibatkeun jalma leutik rea pisan. Program program ieu bertahan bari miboga rating nu alus.

Mun teu salah aya istilah Harmjoy dina Bahasa Inggris atawa Schadenfreude dina bahasa Jerman (Schaden = bahaya,  Freude = kegembiraan) nu ceunah hartina teh rasa senang atawa bagja pas nempo batur susah Atawa sangsara ku sabab hal eta bisa jadi bukti yen manehna leuwih unggul dibanding jalma anu katalangsara eta.

Ceunah eta reaksi biologis nu sarua jeung reaksi pas urang manggih kabungah. Reaksi ieu bakal leuwih kuat efekna mun anu katalangsara eta jalma anu teu di pikaresep ku urang.

Jadi inget jaman leutik, urang sok spontan seuri mun nempo babaturan tisoledat,  komo mun nempo kabogoh mantan tisoledat terus tigujubar ka balong mah,  salian ti seuri teh make aya rasa bagja sagala,  bener teu? Sok we ngaku,  da teu nanaon.

Sanajan ceunah hal eta wajar secara biologis,  tapi tong jadi kabiasaan oge ngumbar-ngumbar kasusah batur,  komo bari di budalkeun ka jalma rea mah. Ceuk peribahasa mah “Seberat-beratnya Mata Memandang,  Masih Lebih Berat Bahu Memikul”.

Sabeurat beuratna urang nahan cimata bedah pas nyaksian kasusah batur,  leuwih peuheur oge nu ngalakonan.

Tapi program atau konten eta teu goreng kabeh sih,  aya sisi positif na oge dina nulungan kasusah jalma,  sanajan kaciri na teu pira keur sultan mah tapi gede pisan efekna keur jalma leutik mah, tibatan php bari kampanyeu.

Mudah mudahan we bangsa ieu leuwih ngaronjat ekonomi na,  makmur rahayatna bari amanah pejabat na. Cag aaah. (Sony Vespa).

***

Judul: Jalma Leutik
Penulis: Sony Vespa
Editor: JHK