The Beauty of Mojang Priangan

BERITA JABAR NEWS (BJN) – Artikel berjudul “The Beauty of Mojang Priangan” ini merupakan karya “Sony Vespa” yang ditulis dengan bahasa Sunda.

Dina pantun atawa dongeng buhun,  urang bakal manggihan gambaran putri geulis nu euyeub ku metafora. Tarangna teja mentrangan, halisna ngajeler paeh, irungna kuwung kuwungan, gadona endog sapotong,  keupatna macan teu nangan.

Metafora di pake sangkan omongan atawa tulisan leuwih keuna,  leuwih di pikaharti,  leuwih gaya, bari ngajak mikir ka nu di ajak ngobrol atawa nu maca.

Ti jaman baheula nepi ayeuna, mojang Priangan kakoncara pisan kageulisan na. Ismail Marzuki dina salah sahiji “lawatan seni” ka Radio Nirom di wewengkon Cililin baheula, nepi ka ngalaman katarik ati kagembang rasa ku mojang Priangan nu keur leumpang mapay galengan sawah. Dasar seniman,  pengalaman na eta ngajadikeun ide kreatif jadi lagu panon hideung.

Lagu eta kakoncara pisan nepi ka ayeuna,  malah di kenal oge nepi ka Rusia (asli na,  wani di riungkeun),  jeung Maroko (Cililin, Kabupaten Bandung Barat).

Geulis bawaning ngajadi,  endah bawaning ti kudrat teh tangtuna moal ngawujud mun teu di dukung oge ku perawatan atawa racikan racikan boh nu di inum mangrupa jamu atawa dibalurkeun mangrupa bedak atawa lulur.

Ramuan alami ieu salian ti murah meriah sareng teu aya efek samping oge kabukti ampuh keur ngaropea,  ngajaga kageulisan mojang priangan. Ramuan ieu sawareh diturunkeun ka anak incu,  aya oge nu di produksi massal bari teu ngurangan kana khasiatna,  bertahan ti baheula nepi ka ayeuna. Kacatet oge dina sejarah,  Ibu Inggit Garnasih baheula kawentar ahli dina ngaracik jamu malah di jadikeun salahsahiji pakasaban saacan jadi ibu presiden.

Salah sahiji “produk kecantikan legend” nu aya ti jaman baheula nepi ayeuna nyaeta Bedak Saripohatji,  dina bungkusna aya Foto S. Marijah nu ngaracik awal jamu ieu katut aya tulisan di produksi di Ciamis,  Djawa Barat sejak 1927. Paingan atuh tulisan na masih make ejaan heubeul.

Wadah wedak tina kertas ipis jeung gambar nu basajan,  estuning ramah lingkungan bari ramah di kantong,  atuda sabungkus ngan Rp 3500 bari bisa keur dua minggueun,  bedak Saripohatji kabukti bisa bertahan mangpuluh puluh taun dina raraga ngilu ngarawat kageulisan mojang priangan.

Mun di Cimahi,  wedak Saripohatji bisa di beuli di tukang rampe atawa tukang dagang parabot keur sasajen atawa bisa oge di beuli di toko obat Po Anthong (Toko Obat “Satria”) nu aya di Jalan Gandawijaya.

Sok geura euceu euceu,  teteh teteh,  ema ema sadayana,  cobaan bedak Saripohatji. Glowing alami siga mojang priangan bari ngamumule ramuan tradisional karuhun. (Sony Vespa).

***

Judul: The Beauty of Mojang Priangan
Penulis: Sony Vespa
Editor: JHK